დღევანდელ რეალობაში კომბუჩა ჯანსაღი ცხოვრების კულტურამ დააბრუნა. ის ჩაის ფერმენტაციით მიღებული ჯანსაღი სასმელია, რომლის უნიკალურობაც ისაა, რომ მისი წარმოება პასტერიზაციისა და დანამატების გარეშეა შესაძლებელი. კომბუჩა არ შეიცავს სინთეტიკურ ნივთიერებებს თუ ხელოვნურ შემნახველ არომატიზატორებს.

რაც შეეხება ფერმენტაციის პროცესს, მისთვის საჭიროა შაქარი და ჩაის დედა (საფუარისა და ბაქტერიების სიმბიოზური კულტურა). ჩაის დედა იკვებება შაქრით და ამ პროცესში სასარგებლო ბაქტერიები მას სასარგებლო მჟავებად (ძმარმჟავა, რძემჟავა, გლუკოგენური მჟავა) გარდაქმნიან. სწორედ ასე იქმნება ცოცხალი და ფუნქციური კომბუჩა.